జ‌గ‌న్‌కి కేసీఆర్ మొండి చెయ్యి

తెలంగాణ ఉప ఎన్నికల్లో పోటీ చేయబోమని ప్రటించడం ద్వారా తెలంగాణ రాష్ట్ర సమితి (తెరాస)కి అనుకూలంగా వ్యవహరించిన వైయస్సార్ కాంగ్రెసు పార్టీ అధ్యక్షుడు వైయస్ జగన్‌కు పరిస్థితి తిరగబడింది. పోటీ చేయబోమని ప్రకటించిన జగన్ పట్ల తెరాస అధ్యక్షుడు కె. చంద్రశేఖర రావు మొదట్లో కాస్తా సానుకూలంగానే వ్యవహరించారు. దీంతో ఇరువురి మధ్య రహస్య అవగాహన కుదిరిందనే విమర్శలు వచ్చాయి. ఇంతలోనే కెసిఆర్ జగన్‌కు ఎదురు తిరిగారు. తెలంగాణలో జగన్‌కు వ్యతిరేకంగా వ్యవహరించేందుకు సిద్ధపడ్డారు. తెరాసకు స్నేహ హస్తం చాచిన వైయస్ జగన్ వరంగల్లు జిల్లా పరకాలలో తన వర్గం నాయకురాలు కొండా సురేఖకు పోటీ లేకుండా చూసుకున్నారనే అభిప్రాయం వ్యక్తమైంది. ఇప్పుడు తమ పార్టీ పోటీ చేయకపోవడం ద్వారా తర్వాత పరకాలలో జరిగే ఉప ఎన్నికల్లో కొండా సురేఖకు తెరాస మద్దతు పొందాలని అనుకున్నట్లు వార్తలు వచ్చాయి. అలాగే, మహబూబ్ నగర్ శాసనసభా స్థానంలో దివంగత శాసనసభ్యుడు రాజేశ్వర రెడ్డి భార్యను పోటీకి దించాలని జగన్ ప్రతిపాదించారు.