రాజీనామాలు ఆమోదిస్తే.. అంతే..!

తెలంగాణ సాధనలో భాగంగా తెలంగాణ రాష్ట్ర సమితి, తెలుగుదేశం తిరుగుబాటు వర్గం ఎమ్మెల్యేలు చేసిన రాజీనామాలు ఆమోదం పొందుతాయా? అన్న చర్చ జరుగుతోంది.కాంగ్రెస్ పార్టీ లో ఈ విషయమై తర్జనభర్జనలు జరుగుతున్నాయి. తెలంగాణ రాష్ట్ర సమితి శాసనసభ్యులు కేవలం ఫాక్స్ ద్వారానే తమ రాజీనామా లేఖలు పంపారు కనుక పెద్దగా ఇబ్బంది ఉండదు. వారు మళ్లీ స్వయంగా వచ్చి రాజీనామాలు సమర్పించడమో, లేక స్పీకర్ ను కలిసి రాజీనామాల గురించి చెప్పడమో జరిగే వరకు పట్టించుకోనవసరం లేదు. కాని నాగం జనార్దనరెడ్డి, హరీశ్వర్ రెడ్డి, వేణుగోపాలచారి, జోగు రామన్నలు స్వయంగా వచ్చి స్పీకర్ కార్యాలయానికి మళ్లీ రాజీనామా లేఖలు అందించారు. వీటిపై స్పీకర్ నాదెండ్ల మనోహర్ నిర్ణయం తీసుకోవలసి ఉంటుంది. పైగా స్పీకర్ కిందటిసారి తెలంగాణ ఎమ్మెల్యేల రాజీనామాలను సామూహికంగా తిరస్కరించిన తర్వాత, నాగం జనార్ధనరెడ్డికి తన పి.ఎస్. ద్వారా ఫోన్ చేయించి మళ్లీ రాజీనామా లేఖ ఇస్తే ఆమోదిస్తామని చెప్పించారు.అందువల్ల అది కూడా పరిగణనలోకి తీసుకోవలసి ఉంటుంది. అయితే ఇక్కడ సమస్య అల్లా తెలంగాణ కు సంబందించి కొందరు ఎమ్మెల్యేల రాజీనామాలు ఆమోదిస్తే, మిగిలిన ఎమ్మెల్యేలు కూడా మళ్లీ రాజీనామాలు ఇవ్వవలసి వస్తుంది. అప్పుడు మరోసారి తిరస్కరించడం స్పీకర్ కు కూడా కష్టం అవుతుంది. అందువల్ల ఏమి చేయాలన్నదానిపై కాంగ్రెస్ లో మల్లగుల్లాలు పడుతున్నారు. స్పీకర్ ఆగస్టు మొదటి వారంలో హైదరాబాద్ కు తిరిగి వచ్చాక మళ్లీ రాజీనామాల అంకానికి తెర లేస్తుంది.