జగన్ ఏం చేయబోతున్నారు?

షాక్ మీద షాక్… కేసు మీద కేసు…ఉచ్చు పక్కనే ఉచ్చు…ఇదీ కడప ఎంపీ వై.ఎస్.జగన్మోహన్ రెడ్డి తాజా పరిస్థితి. ఒక పక్క సీబీఐ దర్యాప్తు, మరో పక్క ఎన్ ఫోర్స్ మెంట్ డైరెక్టరేట్ (ఈడీ) రంగంలోకి దిగడంతో జగన్ ఇరకాటంలో పడ్డారు. దీంతో భవిష్యత్ ఎలా ఉండబోతుందన్నది అద్దంలో కనిపిస్తున్నట్టు ఫీలైపోతున్నారు. సీబీఐ దర్యాప్తు సాగుతున్నా తన కంపెనీల్లో సోదాలు ముమ్మరం చేసినా పైకి నదురుబెదురు కనిపించకుండా ఓదార్పు యాత్రని కొనసాగిస్తూ వచ్చిన జగన్ కు మంగళవారం  (30-08-11) రాత్రి మరో షాక్ తగిలింది. ఈడీ కూడా చురుగ్గా స్పందించింది. సీబీఐ ఇంతకు ముందు ఎఫ్.ఐ.ఆర్ ను తయారుచేసినట్టుగానే, ఈడీ కూడా ఎన్ ఫోర్స్ మెంట్ కేస్ ఇన్ఫర్మేషన్ రిపోర్టు (దీన్నే ఇసీఐఆర్ అంటారు) ను నమోదు చేసింది. పైగా, జగన్ ను ప్రధాన నిందితునిగా పేర్కొన్నారు. ఈయనపై పెట్టిన కేసులు కూడా సామాన్యమైనవి కావు. హవాలా లావాదేవీల నిరోధక చట్టం (ప్రివెన్షన్ ఆఫ్ మనీ లాండరింగ్ యాక్ట్ – పీఎంఎల్ సీ), విదేశీ ద్రవ్య నిర్వాహక చట్టం (ఫారెన్ ఎక్స్చేంజ్ మేనేజ్ మెంట్ యాక్ట్ – ఫెమా) కింద కేసులు నమోదు చేశారు. కఠిన ఈ చట్టాల కింద నేరం రుజువైతే జగన్ జైలు కెళ్లక తప్పదు. కేసు బలంగా ఉండటంతో జగన్ లో వణుకు మొదలైంది. నిన్నమొన్నటి వరకు ఎమ్మెల్యేలను అడ్డం పెట్టుకుని రాజకీయంగా పావులు కదిపిన జగన్ ఇప్పుడు ఎలాంటి వ్యూహం రచించబోతున్నరాన్నదే అసలు ప్రశ్న.
భవిష్యత్ కార్యాచరణపై చర్చలకు రమ్మంటూ జగన్ తన సన్నిహితులు, హితులకు ఇప్పటికే కబురు పంపారు. వైఎస్సార్ వర్ధంతి తరువాత ఏ క్షణంలోనైనా ఈడీ కేసు కింద జగన్ అరెస్ట్ అవడం ఖాయమన్న వాదనలు వినబడుతున్న తరుణంలో జగన్ తన వాళ్లను దగ్గరకు తీసుకోవడంలోని ఆంతర్యం బయటపడుతూనే ఉన్నదని ఓ సీనియర్ కాంగ్రెస్ నాయకుడు అన్నారు. జగన్ పైకి బింకంగానే ఉన్నప్పటికీ, లోపల జంకు మొదలైందనీ, ఇందుకు సంకేతంగానే సన్నిహితులతో సమావేశాన్ని ఏర్పాటు చేయడమని ఆ నాయకుడు చెప్పారు. ఇప్పటికే జగన్ అనేక మంది స్వయంగా ఫోన్లు చేసి హైదరాబాద్ లో పెట్టే సమావేశానికి రావాలంటూ కోరారు. ప్రభుత్వాన్ని కూల్చాలన్న ఆలోచన కంటే, ఒక వేళ తాను అరెస్టయితే, పార్టీని రక్షించుకోవడం, పార్టీని బలపరచేందుకు ఎవరిని నియమించాలన్నది ఖరారు చేయడం సమావేశం ముఖ్యోద్దేశం కావచ్చని కూడా అనుకుంటున్నారు.
అయితే, జగన్ కు ఇప్పటికీ ఛాన్స్ మిగిలే ఉన్నదనీ, ఆయన కాంగ్రెస్ అధిష్ఠానం వద్ద లొంగిపోతే సమస్య వీగిపోతుందని కూడా అనుకుంటున్నారు. కానీ, జగన్ మనస్తత్వం ఇందుకు వ్యతిరేకం. మడమతిప్పని నేతగా ప్రజాబలం సంపాదించుకున్న జగన్ ఇప్పుడు సడన్ గా ప్లేట్ తిప్పేయడనీ, అవసరమైతే ఎలాంటి పరిణామాలనైనా ఎదుర్కుంటారని ఆయన వర్గం వారు చెబుతున్నారు.
మొత్తం మీద జగన్ పరిస్థితి ఇరకాటంలో పడిందన్న సంకేతాలే ఎక్కువగా అందుతున్నాయన్నది జగమెరిగిన సత్యం.

– ఎన్నార్టీ