జ‌న‌వ‌రిలో తెలంగాణ‌..?

తెలంగాణ అంశంపై కేంద్రం జనవరి మొదటి వారంలో ప్రకటన చేసే అవకాశం ఉందా?తెలంగాణ సమస్యను ఎలాగైనా పరిష్కరించాలన్న ఉద్దేశంతో ఉన్న కేంద్రంలోని యుపిఎ ప్రభుత్వం వచ్చే కొద్ది రోజులలో ఏదో ఒక స్పష్టమైన ప్రకటన చేయవచ్చని టిఆర్ఎస్ వర్గాలకు, ఇటు కాంగ్రెస్ వర్గాలకు సమాచారం అందుతోంది. కేంద్ర ఆర్దిక మంత్రి ప్రణబ్ ముఖర్జీ దీనిపై ఒక ప్రకటన చేయవచ్చని చెబుతున్నారు. ప్రధానంగా తెలంగాణ రాష్ట్రం ఏర్పాటుపై ఏకాబిప్రాయం లేనందున తెలంగాణ ఇవ్వలేకపోతున్నామని కేంద్రం చేసే ప్రకటన సారాంశంగా ఉండవచ్చు. అంతేకాక ప్రధాన ప్రతిపక్షమైన తెలుగుదేశం పార్టీపైకి నెపం నెట్టే యత్నం కూడా జరగవచ్చని అంటున్నారు. అలాగే ఆయా పార్టీలు తెలంగాణ అంశంలో యు టర్న్ తీసుకున్న విషయాన్ని కేంద్రం ప్రస్తావించే అవకాశం ఉందని చెబుతున్నారు. కొద్ది రోజుల క్రితం పార్లమెంటు సెంట్రల్ హాల్ లో కేంద్ర వ్యవసాయశాఖ మంత్రి శరద్ పవార్ టిఆర్ ఎస్ అధినేత కె.చంద్రశేఖరరావులు కలుసుకున్నప్పుడు కూడా ఈ విషయం చర్చకు వచ్చిందని , ఇప్పుడు ఉన్న పరిస్థితులలో తెలంగాణ రాష్ట్రం ఇవ్వడం కుదరకపోవచ్చని పవార్ అన్నట్లుగా టిఆర్ఎస్ వర్గాలలో ప్రచారం జరుగుతోంది.కొద్ది రోజుల క్రితం పార్లమెంటులో దీనిపై జవాబు ఇచ్చిన కేంద్ర సహాయ మంత్రి జితేందర్ సింగ్ కూడా ఏకాభిప్రాయం ఉంటేనే తెలంగాణ సాధ్యమన్న సూచన ఇచ్చారని కొందరు గుర్తు చేస్తున్నారు. ఈ నేపధ్యంలో జనవరిలో తెలంగాణపై నిర్దిష్ట ప్రకటన రావచ్చని, ఒక వేళ ఉప ఎన్నికలు, లేదా ఏదైనా ముఖ్యమైన కారణంతో జనవరిలో ప్రకటన రాకపోతే, జూన్, జూలై నెలలవరకు ఈ అంశం తేలకపోవచ్చని కొందరు అంచనా వేస్తున్నారు.