ఈనాడు, సాక్షిల కోల్డ్ వార్‌..!

వై.ఎస్.ఆర్.కాంగ్రెస్ అధ్యక్షుడు, సాక్షి అధిపతి జగన్మోహన్ రెడ్డికి, ఈనాడు సంస్థల అధినేత రామోజీ రావులకు మధ్య నిత్య యుద్దం రక్తి కట్టిస్తోంది. జగన్ ఆస్తులపై కోర్టు విచారణకు ఆదేశాలు ఇవ్వగానే, ఈనాడులో జగన్ ఆస్తుల కేసు అని రాయకుండా అక్రమ ఆస్తుల కేసు అని పెట్టి కధనాలు ఇచ్చింది. ఇక సాక్షి కూడా రామోజికి సంబంధించి చిన్న వివాదం దొరికినా పెద్ద ఎత్తున రాస్తూ సందడిచేస్తోంది. ఇద్దరి మధ్య సాగుతున్న ఈ యుధ్దం ఎప్పుడు ఏ రూపం దాల్చుతుందో తెలియని పరిస్థితి నెలకొంది. రామోజీరావుకు వ్యతిరేకంగా సాక్షి ఒక కధనాన్ని ఇస్తూ మార్గదర్శి కేసు తేలకుండానే ఆయన ఆస్తులు అమ్మకానికి పెట్టారంటూ ఒక పెద్ద కధనాన్ని ఇచ్చింది. రాజశేఖరరెడ్డి అధికారంలో ఉన్నప్పుడు ఈ కేసు మొదలైంది. అప్పట్లో ఈ కేసుపై రకరకాల కధనాలు రావడం, ఆదాయపన్ను శాఖ కేసు పెట్టడం, సిఐడి కూడా దీనిపై విచారణ చేయడం వంటివన్ని జరిగాయి. అకస్మాత్తుగా రాజశేఖరరెడ్డి మరణంతో ఆ కేసులన్నీ వెనుకబడ్డాయి. ఆ తర్వాత జగన్ వంతు వచ్చింది. జగన్ అక్రమ ఆస్తులు సంపాదించారంటూ , వై.ఎస్.జమానాలో జరిగిన ఆయా లావాదేవీలపై ఈనాడు పలుమార్లు కధనాలు వచ్చాయి. ఇది ఇప్పుడు హైకోర్టు వరకు వెళ్లి సిబిఐ విచారణ దశకు చేరింది.ఈ తరుణంలో సాక్షి ఒక కధనాన్ని ఇస్తూ రామోజీ మూడు కంపెనీలను బోగస్ చిరునామాలతో రిజిస్టర్ చేశారని ఆరోపించింది. సాక్షి లో పెట్టుబడులు పెట్టినవారిలో కొన్ని అడ్రస్ లు బోగస్ వని గతంలో ఈనాడు రాస్తే, ఇప్పుడు అదే ఆరోపణ రామోజీరావు ఎదుర్కోవలసి వచ్చింది.రామోజీ తనకున్న టివీ చానళ్లలో 11 చానళ్లను సోని సంస్థకు విక్రయించబోతున్నదన్న వార్తలు వచ్చిన నేపధ్యంలో సాక్షిలో ఈ కధనాలు రావడం విశేషం.రామోజీ ఈటీవి తెలుగు, ఈటివి-2, చానళ్లను ఉషోదయ టెలివిజన్ ప్రైవేటు లిమిటెడ్ సంస్థకు, తెలుగేతర ప్రాంతీయ భాష చానళ్లు ఈటివి కన్నడ, ఒరియా, బంగ్లా, మరాఠి, గుజరాత్ చానళ్ల నిర్వహణకు ప్రిజమ్ , హింది, ఉర్దూ, చానళ్లను పనోరమ కు మళ్లించారని రాశారు.ప్రిజమ్, పనోరమ,టీవీ సంస్థల నమోదిత కార్యాలయాలు పూర్తిగా బోగస్ చిరునామాలలో ఉ్నాయని సాక్షి అభియోగం మోపుతోంది.కార్పొరేట్ పునర్వ్యవస్థీకరణకు అనుమతి కోరుతూ హైకోర్టుకు పెట్టిన పిటిషన్ లో ఈ బోగస్ చిరునామాలున్నాయని రాసిన సాక్షి ఆ చిరునామాలను ప్రస్తావించలేదు.

దీనికి ఈనాడు సమాధానం ఇస్తుందా? లేక పట్టించుకోకుండా వదిలివేస్తుందా అన్నది చూడాలి.

source:kommineni.info